Di Gai Tartib-e-Bazm-e-Kun-Fakan Mere Liye

di gai tartib-e-bazm-e-kun-fakan mere liye

ye zamin mere liye hai asman mere liye

didani hai khud hi apne dil ke zakhmon ki bahar

hech hai rangini-e-har-gulsitan mere liye

zauq-e-sajda chahiye kaisa haram kaisi kunisht

astan-e-dost hai har astan mere liye

jada-e-mehr-o-vafa men mar ke zinda ho gaya

maut hai meri hayat-e-javidan mere liye

azm-e-kamil ko mire har-gam par manzil mili

ban gaiin dushvariyan asaniyan mere liye

ho mubarak hazrat-e-zahid ko firdaus-e-jinan

hai dayar-e-dost khuld-e-javedan mere liye

ham-navaon ko mubarak halqa-e-zulf-e-butan

muztarib zindan men hongi bediyan mere liye

Leave a Comment