Hammad Niyazi
sabz-kheton se umaDti raushni tasvir ki
main ne apni aankh se ik harf-gah tamir ki
sun qatar andar qatar ashjar ki sargoshiyan
aur kahani paḌh ḳhizan ne raat jo tahrir ki
kachchi qabron par saji ḳhushbu ki bikhri laash par
ḳhamushi ne ik na.e andaz men taqrir ki
bachpane ki dars-gahon men purane TaaT par
dil ne hairani ki pahli bargah tasḳhir ki
raushni men raqs karte ḳhaak ke zarrat ne
intiha-e-ab-o-gil ki avvalin tafsir ki
kohsaron ke saron par badalon ki pagḌiyan
ek tamsil-e-numayan aya-e-tat.hir ki
dhund ke lashkar ka charon or pahra tha magar
ik diye ne raushni ki raat bhar tash.hir ki
aaj phir ab-e-muqaddas aankh se hijrat kiya
ghar pahunchne men kisi ne aaj phir taḳhir ki
Leave a Reply