vafa-shi.ar ko tu ne zalil-o-ḳhvar kiya
jafa-parast ye kya sheva iḳhtiyar kiya
uTha.e se na uTha dil ka parda-e-ghaflat
ḳhata hui ki un ankhon pe e.atibar kiya
nigah-e-mast-e-haqiqat to de chuki thi javab
magar ye dil hi tha phir us ne hoshiyar kiya
na vo taḌap rahi dil men na vo rahi sozish
ilaaj kya tha ye kya tu ne gham-gusar kiya
dikha ke jalva-e-batil ki ik jhalak ai husn
ḳhuda ke banda ko nahaq gunahgar kiya
kisi ke bas ka dil-e-muztarib na tha lekin
hamin ne ḳhugar-e-andoh-e-intizar kiya
ḳhayal-e-ishq ne rahmat se bhi rakha mahrum
ye kya kiya ki gunahon pe e.atibar kiya
kahe men aa ke dil-e-na-subur ke ham ne
tamam shab tire aane ka intizar kiya
tumhen to ḳhaak men milna tha mil ga.e aḳhir
jahan men shauq abas un ko sharmsar kiya
Leave a Reply