hai teri hi kaenat ji men
ji tujh se hai teri zaat ji men
tu ne kiya qatl go ba-zillat
samjha main ise najat ji men
kyuun gham ye mujhi pe mehrban hai
sab shaad hain zi-hayat ji men
is tang-dahan ke sukhan par
yaan guzre hain so nikat ji men
har-dam ba-hazar jalva-e-nau
dekhun huun tiri sifat ji men
dam ankhon men aa raha hai ‘jurat’
guzre hai ye aaj raat ji men
aa jaave to hal-e-dil suna len
rah jaae na ji ki baat ji men
Leave a Reply