Poet
kufr se matlab hai na islam se
hai gharaz ma.ashuq-e-ḳhush-andam se
hai gharaz ḳhum se subu se jaam se
kaam hai ham ko mai-e-gulfam se
dafn kar ke haa.e kahta hai koi
qabr men ab so raho aram se
qaf-o-lam-o-qaf hai har dam hamen
ḳhush adu hai vaav sad-o-lam se
kya gharaz aa.en ayadat ko vo kyuun
un ko kab fursat hai apne kaam se
hazrat-e-adam jo nikle ḳhuld se
ham bhi nikle kucha-e-asnam se
chashm-e-janan ki ghalat tashbih hai
is ko kuchh nisbat nahin badam se
jo halavat is men hai us men kahan
qand phika hai tiri dushnam se
jaa.en ham kahiye to ai ‘sabir’ kahan
vasta hai ik but-e-ḳhud-kam se
Leave a Reply