Khol Kar Baat Ka Bharam Donon

Sajjad Baluch

khol kar baat ka bharam donon

kam-suḳhan ho ga.e hain ham donon

ho ga.e ab juda to kya kahiye

the ḳhata-kar besh-o-kam donon

jab milenge to bhuul ja.enge

jo abhi sochte hain ham donon

daf.atan samna hua apna

ji uThe jaise ek dam donon

hijrat-o-hijr se bacha.e ḳhuda

mujh ko lahaq hain aaj gham donon

ab yahi ek raah bachti hai

bas yahin rok len qadam donon

mujh pe guzra hai vaqt-e-hijr-o-visal

dil ne dekhe hain zer-o-bam donon

jab nimaT ja.enge ye hangame

phir se ho ja.enge baham donon