Sarfraz Nawaz
tire ḳhulus ke qisse suna raha huun main
purana qarz hai ab tak chuka raha huun main
ḳhuda kare ki vahi baat us ke dil men ho
jo baat kahne ki himmat juTa raha huun main
safar kahan se kahan tak pahunch gaya mera
ruke jo paanv to kandhon pe ja raha huun main
sama.aton ke sabhi dar yahan muqaffal hain
na jaane kab se sada.en laga raha huun main
laga huun aaj hifazat men ḳhud charaghon ki
ka.i dinon to muḳhalif hava raha huun main
ye aql, hosh, nazar, ḳhvab, lams, goya.i
lo aaj daa.v pe sab kuchh laga raha huun main
ki jab bhi chahen unhen DhunD len miri anhken
is ehtiyat se manzar saja raha huun main
mire baghair koi tum ko DhunDta kaise
tumhen pata hai tumhara pata raha huun main
Leave a Reply