Aage Harim-E-Gham Se Koi Rasta Na Tha

aage harim-e-gham se koi rasta na tha

achchha hua ki saath kisi ko liya na tha

daman-e-chak chaak gulon ko bahana tha

dil ka jo rang tha vo nazar se chhupa na tha

rang-e-shafaq ki dhuup khili thi qadam qadam

maqtal men subh-o-sham ka manzar juda na tha

kya bojh tha ki jis ko uthae hue the log

mud kar kisi ki samt koi dekhta na tha

kuchh itni raushni men the chehron ke aaine

dil us ko dhundhta tha jise janta na tha

kuchh log sharmsar khuda jaane kyuun hue

apne siva hamen to kisi se gila na tha

har ik qadam utha tha nae mausamon ke saath

vo jo sanam tarash tha but pujta na tha

jis dar se dil ko zauq-e-ibadat ata hua

us astan-e-shauq pe sajda rava na tha

andhi men barg-e-gul ki zaban se ada hua

vo raaz jo kisi se abhi tak kaha na tha