Tumhaara Hath Jab Mere Larazte Hath Se chhuTa KHizan Ke aaKHiri Din The

Amjad Islam Amjad

tumhara haath jab mere larazte haath se chhuTa ḳhizan ke aḳhiri din the

vo mohkam be-lachak va.ada khilaune ki tarah TuuTa ḳhizan ke aḳhiri din the

bahar aa.i na thi lekin havaon men na.e mausam ki ḳhushbu raqs karti thi

achanak jab kaha tum ne mire munh par mujhe jhuTa ḳhizan ke aḳhiri din the

vo kya din the yahin ham ne baharon ki dua ki thi kisi ne bhi nahin socha

chaman valon ne mil kar jab ḳhud apna hi chaman luuTa ḳhizan ke aḳhiri din the

likha tha ek taḳhti par koi bhi phuul mat toḌe magar andhi to an-paḌh thi

so jab vo baagh se guzri koi ukhḌa koi TuuTa ḳhizan ke aḳhiri din the

bahut hi zor se piiTe hava ke bain par siine hamare ḳhair-ḳhvahon ne

ki chandi ke varaq jaisa samay ne jab hamen kuuTa ḳhizan ke aḳhiri din the

na rut thi andhiyon ki ye na mausam tha havaon ka to phir ye kya hua ‘amjad’

har ik konpal hui zaḳhmi hua majruh har buuTa ḳhizan ke aḳhiri din the