Ashfaq Husain
jab se apne ghar ke bam-o-dar se nikle hain
kaise kaise manzar pas-manzar se nikle hain
narm zamin aur paani ke muhtaj nahin hain ham
ham to vo konpal hain jo patthar se nikle hain
koi to apne jaisa apne andar hai maujud
apni zaat ke bahar kis ke Dar se nikle hain
shor ki chadar ke pichhe hai ḳhamoshi ka raqs
sannaTe avazon ke paikar se nikle hain
kis se jang laḌenge kis ko fat.h karenge ham
dushman ke hathiyar ḳhud apne ghar se nikle hain
na-manus fazaon ko ‘ashfaq’ na do ilzam
ḳhauf ke jo bhi raste hain andar se nikle hain
Leave a Reply