khuda-maalum kis ki chand se tasvir mitti ki
jo goristan men hasrat hai gareban-gir mitti ki
navazi sarfarazi ruuh ne tasvir mitti ki
khusha-tale khusha-qismat khusha-taqdir mitti ki
haqiqat men ajaib-shobada-pardaz-e-duniya hai
ki jo insan ki surat tha vo hai tasvir mitti ki
jise ruuya men dekha tha milaya khaak men us ne
muqaddar ne hamare khvab ki taabir mitti ki
mazaron men dikha kar ustukhan hasrat ye kahti hai
koi pursan nahin un ka ye hai tauqir mitti ki
ye nahaq barhami hai khaksaron ke ghubaron se
kharabi andhiyon ne ki hai be-taqsir mitti ki
vo vahshi tha ki mar ke bhi na maidan-e-junun chhuta
miri mayyat rahi sahra men daman-gir mitti ki
na li turbat ko gulshan men jagah li bhi to sahra men
riyazat sab hamari tu ne ai taqdir mitti ki
mire sayyad ne jis jis jagah tuuda banaya tha
vahan ja ja ke bu lete phire nakhchir mitti ki
azal ke roz se ghash hain jo insan khaksari par
sarisht un ki hai mitti se ye hai tasir mitti ki
ye aalam ho gaya hai jamte jamte gard-e-sahrai
ki majnun puchhta hai kya ye hai zanjir mitti ki
hamare khaak ke tuude ko nabud aa ke kar denge
nishani bhi na chhodenge tumhare tiir mitti ki
ijazat se tumhari guftugu ki sang-rezo ne
barabar sunne valon ne suni taqrir mitti ki
gali men yaar ki aise hue ho gard-aluda
ki bilkul ho gae ho ai ‘sharaf’ tasvir mitti ki
Leave a Reply