Hum Apni Haqiqat Kis Se Kahen Hain Pyase Ki Sairab Hain Hum

Mohammad Ahmad

ham apni haqiqat kis se kahen hain pyase ki sairab hain ham

ham sahra hain aur jal-thal hain hain dariya aur payab hain ham

ab gham koi na sarshari bas chalne ki hai tayyari

ab dhuup hai phaili angan men aur kachchi niind ke ḳhvab hain ham

haan sham-e-tamanna bujh bhi ga.i ab dil tiira tarik bahut

ab hiddat-e-gham na josh-e-junun ai dasht-e-talab barfab hain ham

ye tanha.i ye ḳhamoshi taara bhi nahin is shaam koi

kuchh daagh sameTe siine men tanha tanha mahtab hain ham

ham jis men Duub ke ubhre hain vo dariya kaisa dariya tha

ye kaisa ufuq hai jis ki athah gahra.i men gharqab hain ham

ham misl-e-sharar hain jugnu hain ham tira-shab ke aansu hain

ham najm-e-sahar ham rashk-e-qamar haan har surat shab-tab hain ham

ik huzn-o-malal ka sail-e-bala sab ḳhvab baha kar le bhi gaya

phir phuul khile man-angan men phir dekh hamen shadab hain ham

lakhon ham jaise milte hain nayab nahin hain ham ‘ahmad’

haan un ke liye jo dil se mile vo jante hain kamyab hain ham