Sahraon Mein Ja Pahunchi Hai Shahron Se Nikal Kar

Saleem Betab

sahraon men ja pahunchi hai shahron se nikal kar

alfaz ki ḳhushbu mire honTon se nikal kar

siine ko mire kar gaya ik aan men raushan

ik nuur ka kaunda tiri ankhon se nikal kar

main qatra-e-shabnam tha magar aaj huun suraj

aa baiTha huun main sadiyon men lamhon se nikal kar

ho ja.enge basti ke dar-o-bam munavvar

suraj abhi chamkega darichon se nikal kar

kya janiye ab kaun si janib ko gaya hai

ik zard sa chehra tiri galiyon se nikal kar

har samt tha ik talḳh haqa.eq ka samundar

dekha jo tasavvur ke jaziron se nikal kar

vo pyaas hai miTTi pe zaban pher rahe hain

ham aa.e hain ehsas ke sho.alon se nikal kar

har aan sada dete hain ma.asum ujale

‘betab’ chale aao dhundlakon se nikal kar