jaane kis alam-e-ehsas men kho.e hue hain
ham hain vo log ki jaage hain na so.e hue hain
apne anjam ka dekhega tamasha kabhi vo
jite-ji ham to abhi se use ro.e hue hain
daagh miTta nahin kuchh aur numayan hua hai
apne haath aap ne kis chiiz se dho.e hue hain
kuchh samajh men nahin aata ye mukafat-e-amal
kaTte kyuun nahin jo aap ne bo.e hue hain
ruuh apni rahi hai qurb-e-badan se sarshar
ham farishte nahin daman ko bhigo.e hue hain
saans lene ko bhi ab in ki taraf dekhta huun
nok-e-nashtar jo rag-e-jan men chubho.e hue hain
kya mila un se hamen ḳhaak nadamat ke siva
ham bhi kin ḳhvabon ki ta.abir ko Dho.e hue hain
itne nadan bhi nahin ham ki samajh bhi na saken
aap lahje men jo shirini samo.e hue hain
Leave a Reply