Hamari Qurbaton Mein Fasla Na Rah Jae

Tasneem Abidi

hamari qurbaton men fasla na rah jaa.e

qadam se lipTa hua rasta na rah jaa.e

hava-e-vahshat-e-dil tez chal rahi hai bahut

rida-e-hijr mira sar khula na rah jaa.e

ḳhuda ke naam pe jis tarah log mar rahe hain

dua karo ki akela ḳhuda na rah jaa.e

ye log kis liye apne tavaf men hain magan

sanam-kade men musalla bichha na rah jaa.e

tanaben kaaT raha hai vo ḳhvahishon ki miri

kahin pe dasht men ḳhema laga na rah jaa.e

ye lamha lamha jo ham jam-e-hijr pi rahe hain

to tishnagi ka saliqa dhara na rah jaa.e

mujaviran-e-adab ik nazar inayat ki

ghazal ki shakl men katba laga na rah jaa.e