suraj ko kya pata hai kidhar dhuup chahiye
angan baḌa hai apne bhi ghar dhuup chahiye
a.ine TuuT TuuT ke bikhre hain char-su
DhunDenge aks aks magar dhuup chahiye
bhige hue paron se to uḌne na pa.enge
kaTun na un parindon ke par dhuup chahiye
ham se darida-pairahan-o-jan ke vaste
yaqut chahiye na guhar dhuup chahiye
suraj na jaane kaun si vaadi men chhup gaya
aur chiḳhti phire hai sahar dhuup chahiye
ik niind hai ki aankh se lag kar nikal ga.i
ab raat ka tavil safar dhuup chahiye
paani pe chahe naqsh bana.e koi ‘matin’
kaghaz pe main bana.un magar dhuup chahiye
Leave a Reply