ḳhuda ka shukr hai koi bichhaḌ kar lauT aaya hai
zamane bhar ke afsane bhi apne saath laaya hai
ta.aruf ho to main tum ko bata.un us ke baare men
ki jis ki yaad ne mujh ko sataya hai rulaya hai
suna to hai ki mera naam sun kar vo but-e-kafir
zara sa gungunaya hai bahut sa muskuraya hai
mohabbat muḳhtalif andaz se karta raha hai vo
kabhi us ne giraya hai kabhi us ne uThaya hai
kisi ko apni nakami ka kaise dosh duun ‘jazib’
miri avargi ne hi mujhe ye din dikhaya hai
Leave a Reply