ba-tasḳhir-e-butan tasbih kyuun zahid phirate hain
ye lohe ke chane vallah ashiq hi chabate hain
bani hai juun guhar-surat suḳhan ki ahl-e-ma.ani se
ye nadan kahne sunne ko abas baten banate hain
sada se ishq ki lai bhar rahi hai jin ke kanon men
vo kab sunte hain ye naseh jo apna raag gaate hain
bahar aa.i na chhuTe ham qafas se ham-safir apne
chaman men chahchahe karte hain aur dhumen machate hain
ḳhuda se dosti teri magar ham ko mila degi
sanam na-haq tire ham roz naktonDe uThate hain
koi kaisa hi ruTha ho bula lete hain ik pal men
ye zalim ḳhub-ru sammukh ho jab ankhen laḌate hain
saba kis gul ke aane ki ḳhushi aisi hai gulshan men
ki gul jaame men aaj apne nahin phule samate hain
hansate hain tujhe sakin chaman ke kis ḳhushamad se
ki bulbul hai ghazal-ḳhvan chuTkiyan ghunche bajate hain
ham apne dil ki halat kya kahen bin maut marte hain
tujhe Tuk dekh lete hain to goya jaan paate hain
gareban ka hamare naseha mauquf kar siina
ki ham siine ka apne zaḳhm-e-kari kab silate hain
ummid aane ki us ayyar ke ham ko nahin hargiz
ḳhayal-e-ḳham par apni abas chhati pakate hain
tamasha shaiḳh ji ke haal ka hai tohfa majlis men
zanburi hain murid aur chauk men bandar nachate hain
ham aisi goliyan kachchi nahin khele hain ye laḌke
jo chuTiyale hue hain Tip-Tap un ko dikhate hain
dilon ke aa.ine ab ban ga.e hain sang-o-ahan ke
ki mil kar ji men jagah den bichhaḌ kar bhuul jaate hain
bahut maare ga.e vaan aur bahut zaḳhmi hue tis par
‘muhib’ kuche men us ke aaj ham phir dil jalate hain
Leave a Reply