Tilok Chand Mahroom
badnam huun par ashiq-e-badnam tumhara
nakam huun par talib-e-nakam tumhara
main is ko na bechun evaz-e-mulk-e-sulaiman
hai sabt sar-e-ḳhatim-e-dil naam tumhara
yaan saghar-e-dil ḳhun-e-tamanna se bhara hai
par bada-e-gulgun se vahan jaam tumhara
mahrumi-e-qismat hai miri ḳhaas vagarna
mash.hur-e-jahan hai karam-e-am tumhara
jachte nahin nazron men mah-o-mehr ke jalve
rahta hai tasavvur sahar-o-sham tumhara
tum jis se phiro us se ho bargashta zamana
dam bharne lagi gardish-e-ayyam tumhara
ghaflat men kaTi jaati hai ‘mahrum’ javani
achchha nazar aata nahin anjam tumhara
Leave a Reply