nazar men rang sama.e hue usi ke hain
ye saare phuul ugaa.e hue usi ke hain
usi ke lutf se basti nihal hai saari
tamam peḌ laga.e hue usi ke hain
usi ke husn ki parchha.iyan hain patton par
zamin ne bojh uTha.e hue usi ke hain
vo jis ke qurb se harf-e-visal hai raushan
mire charag jala.e hue usi ke hain
ye barishen bhi usi ki hain meri a.ankhon men
ye abr zehn pe chha.e hue usi ke hain
ye agahi jo hamen yuun hamare haal ki hai
ye sab kamal sikha.e hue usi ke hain
ye toḌ-phoḌ ghazal men usi ke naam ki hai
ye saare shor macha.e hue usi ke hain
hamare lahje men jo ik miThas hai baaqi
hamen ye zahr pila.e hue usi ke hain
ba-juz jamal hamen aur kya dikha.i de
nazar pe pahre biTha.e hue usi ke hain
usi jabin se nikalta hai ‘qais’ chand mira
ye asaman saja.e hue usi ke hain
Leave a Reply