ai but-e-na-ashna kab tujh se begane hain ham
tu agar is bazm men mai hai to paimane hain ham
bosa leven ya gale lag jaa.en azurda na ho
chahne vaale hain aur divane mastane hain ham
kab alam aur hasraten apni kahen ai dostan
raat ko bulbul hain ham aur din ko parvane hain ham
ghurne se kya tumhari ankhon ke ham Dar ga.e
ve agar hain mast ai pyare to divane hain ham
ai ‘raza’ ham mil ga.e us se gale pi kar sharab
go hain divane par apne kaam ke syane hain ham
Leave a Reply