Sehn-E-Chaman Mein Jaana Mera Aur Faza Mein Bikhar Jaana

sehn-e-chaman meñ jaanā merā aur fazā meñ bikhar jaanā

shāḳh-e-gul ke saath lachaknā sabā ke saath guzar jaanā

sehr-bharī do āñkheñ merā pīchhā kartī rahtī haiñ

nāgin kā vo muḌ kar dekhnā phir vaadī meñ utar jaanā

zaḳhm hī terā muqaddar haiñ dil tujh ko kaun sambhālegā

ai mere bachpan ke sāthī mere saath hī mar jaanā

sūraj kī in āḳhirī maddham kirnoñ ko gin sakte haiñ

din kā vo motī sā chamaknā phir paanī meñ utar jaanā

yahīñ kahīñ sahrā meñ Thahar jā dam lene kī baat nahīñ

ḳhaak sivā rakkhā hī kyā hai yahāñ se aur kidhar jaanā

us se ab dasht-e-imkāñ ke safar-hazar kā pūchhnā kyā

jis ne rāhguzar ke ghane peḌoñ ko bhī dard-e-sar jaanā

ek nihāñ-ḳhāne ke taaq par ā.īna rakkhā thā ‘zeb’

ek jhalak sī apnī dekhnā aur vo merā Dar jaanā

Leave a Comment