Sabiha Sumbul
kaun aisa hai yahan dil se mujhe yaad kare
vaqt thoḌa sa mire vaste barbad kare
ho ga.iin bastiyan viran yahan pal bhar men
koi to aa.e jo phir se inhen abad kare
pa-ba-zanjir koi daar pe mansur nahin
haq ki baton pe bhala kaun yahan saad kare
kaisa pindar hai dil qaid hain ḳhushiyan jis men
in parindon ko hi azad ye sayyad kare
murda jismon men muqayyad hain taḌapti ruhen
koi zindan-e-nihan se unhen azad kare
jis ki buniyad mohabbat ki ho zamin ‘sumbul’
aisa ik shahr yahan koi to abad kare
Leave a Reply