Shakeeb Rizvi
dushman-e-jan bhi vahi hasil-e-arman bhi vahi
gham ka saman bhi vahi dard ka darman bhi vahi
lutf-e-gul-gasht magar ab vo kahan tere baghair
rang-e-gulshan hai vahi josh-e-baharan bhi vahi
ba.ad divane ke agli si vo raunaq na rahi
bazm-e-ḳhuban hai vahi shahr-e-nigaran bhi vahi
aaj tak atish-e-gham jan-e-jahan kam na hui
zaḳhm hain ab bhi vahi sozish-e-pinhan bhi vahi
ḳhanda-bar-lab jo the hangam ata-e-gham-e-dil
jaane kya guzri nazar aa.e pasheman bhi vahi
Duuba jaata hai ye kyuun aaj dil-e-zar ‘shakeb’
bazm-e-ahbab vahi aish ke saman bhi vahi
Leave a Reply