Suhail Kakorvi
junun ki raah men pahle dar-e-janana aata hai
faraghat hai phir is ke baad hi virana aata hai
ye dil ki baat hai aur baat ye dil hi samajhta hai
hamare paas aksar chal ke ḳhud mai-ḳhana aata hai
karo har gaam par sajde mohabbat ka taqaza hai
bahut nazdik hai aur yaar ka kashana aata hai
hui hai kargar tarkib mere dil ki ḳhvahish ki
mujhe bimar sun kar koi betabana aata hai
lagati hai gale se sham.a us ko main samajhta huun
fana ho kar baqa ke rang men parvana aata hai
shafaq se mai barasti hai ajab gul-rang hai aalam
nazar men meri suraj surat-e-paimana aata hai
suḳhan hai mo’atabar tera ‘suhail’ us ne kaha mujh se
qalam se tere aksar sher ustadana aata hai
Leave a Reply