aane men tere dost bahut der ho ga.i
bazm-e-hayat ab zabar-o-zer ho ga.i
parde kuchh aise ru-ba-ru ankhon ke aa ga.e
duniya miri nigah men andher ho ga.i
duniya ke jabr-o-jaur se kyunkar amaan mile
main chup raha to aur bhi vo sher ho ga.i
kya puchhte hain ab dil-e-mahzun ka haal aap
us ko mare hue to bahut der ho ga.i
har chand zindagi ne sambhale liye bahut
phir bhi ajal ke haath se vo zer ho ga.i
‘sarshar’ zikr-e-raunaq-e-bagh-e-jahan na kar
ukta gaya dil is se nazar ser ho ga.i
Leave a Reply