Bakhtiyar Ziya
harf ma.ani se juda ho jaise
zindagi koi saza ho jaise
ba.ad muddat ke ye mahsus hua
dard hi dil ki dava ho jaise
aur kya hogi faza-e-firdaus
tere kuche ki faza ho jaise
un nigahon ne jo pursish ki hai
aaj har zaḳhm hara ho jaise
aap se mil ke to kuchh aisa laga
fasla aur baḌha ho jaise
aah kya umr guzari ham ne
naqsh ban ban ke miTa ho jaise
kaanp jaata huun uqubat se ‘ziya’
ab mujhe ḳhauf-e-ḳhuda ho jaise
Leave a Reply