Maqsood Afaq
puchhe hai mira dil tiri tanha.i se kya kya
pahlu men koi shaḳhs numudar hua kya
dil sail-e-havas men to pahunchta hai kahin aur
mad.hosh musafir ho to manzil ka pata kya
ai zehn-e-rasa kuchh sipar-andaz to ho ja
dekhen to javab aate hain aflak se kya kya
kyuun phailti jaati hai koi ḳhushbu-e-manus
dil abr ki manind tire dar se uTha kya
ai rahbar-e-maruf ye taskin-e-safar kyuun
tujh ko nazar aaya mira naqsh-e-kaf-e-pa kya
aaya huun bari ho ke main aivan-e-ḳhirad se
ye shahr-e-mohabbat hai yahan meri saza kya
ik zaḳhm mahakta hai tumhara rag-e-jan par
samjhun main use apni vafaon ka sila kya
hai mahv-e-tamanna dil-e-azurda ki dekhe
pindar-e-mohabbat men hai andaz-e-ḳhuda kya
‘afaq’ mire chand ke baare men na puchho
aa jaa.e vo angḌa.i pe to raqs-e-saba kya
Leave a Reply