Shahzad Anjum Burhani
sochiye gar use har nafas maut hai kuchh mudava bhi ho be-hisi ke liye
surajon ki virasat mili thi hamen dar-ba-dar ho ga.e raushni ke liye
koi avaz hai vo koi saaz hai us se hi rang-o-nik.hat ka dar baaz hai
jis taraf ho nazar vo rahe jalva-gar kaise sochenge ham phir kisi ke liye
bad-dimaghi miri hai vahi jo ki thi tarz-e-ḳhud-bin tumhara vo hai jo ki tha
chal rahe hain ana ke sahare magar rasta hi nahin vapsi ke liye
ho salamat mira ishq josh-e-junun husn ke raaz ḳhud munkashif ho ga.e
itni mushkil nahin rahguzar-e-fana be-ḳhudi chahiye agahi ke liye
is zamane se koi tavaqqo na rakh kis men himmat hai ḳhanjar pe rakh de zaban
adl-gahon men insaf bikne laga sach bhi kahna hai jurm aadmi ke liye
tum se ik ghunT ki pyaas kya bujh saki jab ki vabastagi to samundar se thi
ham ne dariyaon tak ka safar tai kiya apne be-ma.ani si tishnagi ke liye
aadmi ki havas ka Thikana nahin lekin ‘anjum’ ḳhuda se yahi mangna
ik vafadar biivi ho bachche hon ghar aur kya chahiye zindagi ke liye
Leave a Reply