fatima-hasan

Khushbu Hai Aur Dhima Sa Dukh Phaila Hai

khushbu hai aur dhima sa dukh phaila hai

kaun gaya hai ab tak lawn akela hai

kyuun aahat par chaukun main kis ko dekhun

be-dastak hi aaya jab vo aaya hai

khuli kitaben samne rakkhe baithi huun

dhundle dhundle lafzon men ik chehra hai

raat dariche tak aa kar ruk jaati hai

band ankhon men us ka chehra rahta hai

avazon se khali kirnen phaili hain

khamoshi men chand bhi tanha jalta hai

jaane kaun se raste pe kho jaae vo

shahr men bhi asebon ka Dar rahta hai

More Poems

Leave a Comment