Zindagi KHwab Ki Tarah Dekhi

zindagī ḳhvāb kī tarah dekhī

naav girdāb kī tarah dekhī

merī uryāniyoñ ko Dhāñp liyā

gard kam-ḳhvāb kī tarah dekhī

umr bhar chheḌtī rahī ham ko

saañs mizrāb kī tarah dekhī

rāste kī thakan bhī kāñdhe par

māl-o-asbāb kī tarah dekhī

ishq ne us ko raakh kar Daalā

barf tezāb kī tarah dekhī

ġharq ho ho ga.e pasīne meñ

dhuup sailāb kī tarah dekhī

ham ne zinda-dilī ‘muzaffar’ meñ

ahl-e-punjab kī tarah dekhī

Leave a Comment