firaq-e-yar ka ḳhatra visal-e-yar men hai
ḳhizan ki fikr ḳhizan men na thi bahar men hai
ulajh raha huun ki dil mera kis shumar men hai
na iḳhtiyar se bahar na iḳhtiyar men hai
chaman kahan jo ḳhayal-e-ḳhizan chaman men rahe
bahar hi vo nahin hosh jis bahar men hai
yahan to zikr ko kaafi nahin dili harkat
hazar daana ki tasbih kis shumar men hai
chaman men ja ke gareban ko chaak kar ‘natiq’
suna hai mausam-e-gul tere intizar men hai
Leave a Reply