Asad Badayuni
dilon par ḳhauf bhi taari bahut hai
magar jangon ki tayyari bahut hai
ḳhirad ki bastiyon ke phunkne ko
junun ki ek chingari bahut hai
sabhi zad men hain dasht-o-koh-o-insan
ye zarb-e-vaqt hai kaari bahut hai
purana ḳhushk patta kah raha tha
hava men tez-raftari bahut hai
ham apne dil ki duniya dekhte hain
hamen ye shaghl-e-bekari bahut hai
chale ho us se milne par ye sun lo
use shauq-e-dil-azari bahut hai
nahin hai saath rahna garche asan
bichhaḌne men bhi dushvari bahut hai
Leave a Reply