Aamad-E-Fasl-E-Bahaaran Nahin Jine Deti

āmad-e-fasl-e-bahārāñ nahīñ jiine detī

vus.at-e-chāk-e-garebāñ nahīñ jiine detī

hasrat-e-dīda-e-namnāk rulātī hai mujhe

yādash-e-umr-e-gurezāñ nahīñ jiine detī

qaid-e-gesū se rihā.ī kā nahīñ hai imkāñ

ḳhushbū-e-zulf-e-pareshāñ nahīñ jiine detī

kunj-e-tanhā.ī meñ yuuñ shikva-ba-lab baiThā huuñ

tañgī-e-gor-e-ġharebāñ nahīñ jiine detī

jān-levā hai ‘muzaffar’ ye taġhāful un kā

tīrgī-e-shab-e-hijrāñ nahīñ jiine detī

Leave a Comment