ḳhurshid ki nigah se shabnam ko aas kya
tasvir-e-rozgar se dil hai udaas kya
shohrat ki gard ḳhvab ke tufan ghamon ki dhuul
in ke siva hai aur zamane ke paas kya
TuuTa na zor-e-gham na zamane ka sar jhuka
niklegi vasl-e-yar se dil ki bhaḌas kya
ham ko kitab-e-zist ka har baab hifz hai
ik bab-e-gham ka sirf paḌhen iqtibas kya
nikle hain zahr karb men bujh kar tamam lafz
gholen subu-e-sher men gham ki miThas kya
jin ki nazar men hech hai taj-e-hunar ‘na.im’
un ke huzur main kya miri iltimas kya
Leave a Reply