Poet
kuchh na kuchh sochne pe huun majbur
log samjhen agar mazaq-e-shu.ur
ek be-nam si talab ke liye
sar-ba-sajda huun nafraton ke huzur
dhaḌkanen dil ki chahti hain jumud
bolne par na kijiye majbur
ek ummid ke sahare par
ghup andheron ko kar raha huun ubuur
rah-e-manzil ka phir ta.ayyun kya
har musafir ka hai alag manshur
main ne aksar tarash kar dekha
husn deta hai pattharon ko ghurur
us ki ḳhushbu ke da.ere na ḳhutut
log alfaz men rahe mahsur
sanehe ka ḳhayal aate hi
aadmi muḌ ke dekhta hai zarur
kis faza men kaTi ye umr ‘nazar’
saans lene ka aa saka na shu.ur
Leave a Reply