Hazar Sharm Karo Wasl Mein Hazar Lihaz

hazar sharm karo vasl men hazar lihaz

na nibhne dega dil-e-zar o be-qarar lihaz

na gudgudao mujhe main bhi tum ko chhedunga

main kar chuka huun tumhara hazar baar lihaz

naqab uthne ki jurat kahin na kar baithe

badhae kyuun dil-e-muztar ka iztirar lihaz

sharab pi chuke be-chare ko ijazat do

khada hai der se rukhsat ko ai nigar lihaz

main madh-sanj huun dil se tire talavvun ka

na paedar hai ulfat na paedar lihaz

batao to ye rahega visal men kab tak

hamare haath ke badle gale ka haar lihaz

karen jo aap tajahul to kyuun na samjhaun

kare huzur kahan tak vafa-shiar lihaz

vo apne sar ko zara bhi utha nahin sakte

jhuki hui hai jo gardan to hai savar lihaz

jo un se puchho to un ke khilaf hai shokhi

jo ham se puchho to ham ko hai nagavar lihaz

takalluf uthte hi ‘parvin’ vo khuub khul khele

hua hai shokhiyon se kitna be-viqar lihaz

Leave a Comment