Poet
mohabbat se tariq-e-dosti se chaah se mango
mire sahab kisi se dil jo mango raah se mango
ga.e farhad-o-qais un ka nazir ik main jahan men huun
azizan ḳhair baaqi mandgan allah se mango
ḳhat us kafir ne qatl-e-am ka farman nikala hai
musalmano panah us afat-e-nagah se mango
agar hai azm rum-o-zang ki tasḳhir ka baare
kumak tum ankhḌiyon apni ki nadir-shah se mango
numud ai ashiqo gar ma.arke men ishq ke chaho
to mango tabl naale se alam-dar aah se mango
nazar sab kuchh paḌe uTh jaa.e ghaflat ka agar parda
jahan ki diid ki ruḳhsat dil-e-agah se mango
milun main yaar se phir aap ke dhaḌi hai aur sandal
dua.en shaiḳh ji piron ki tum dargah se mango
dimagh us ka falak par hai abas ḳhajlat-zada hoge
miyan dil sunte ho bosa na tum us maah se mango
ma.al-e-kar us ka ḳhaak hai juz ḳhvari-o-zillat
amaan ai dosto duniya men hubb-e-jah se mango
siva ik mal-o-zar ke jan-o-dil hai din-o-iman hai
tumhen jo chahiye is apne daulat-ḳhvah se mango
liye aur gum kiye lakhon hi us ne ye nahin hota
‘muhib’ dil de ke phir us shoḳh-e-be-parvah se mango
Leave a Reply