jaur-e-zamin na tha sitam-e-asman na tha
vo bhi tha vaqt jab ki gham-e-do-jahan na tha
koi bhi lutf-e-zist tah-e-asman na tha
duniya miri ḳharab thi tu mehrban na tha
sunta ye kaun zabt pe qaabu nahin hai ab
achchha hua jo koi mira raz-dan na tha
divangi ne baat bana di ki us se main
zid kar raha huun ab ki ye mera bayan na tha
badnam ḳhud hue ho zaban se nikal kar
mera siva tumhare koi raz-dan na tha
sajdon ki daad mil ga.i bab-e-qubul se
maana nazar ke samne vo astan na tha
mayusi-e-nazar ke manazir hain ḳhaufnak
phir aap hi kahenge mujhe ye guman na tha
vo mere samne the main tha un ke samne
jab tak ki mera raaz kisi par ayaan na tha
lillah ham se qissa-e-‘alim’ na puchhiye
sunte hain laash par koi bhi nauha-ḳhvan na tha
Leave a Reply