Poet
taron vaali raat ka aalam piine aur pilane se
saaqi ne mai khinch ke rakh di goya daane daane se
tar-e-gareban siine vaale chak-ba-daman aa.e hain
ya.ani kuchh taqdir na suljhi uljhi thi divane se
raat nahin ye ziist ka din hai hosh men aa barbad na kar
sham.a faqat mehman-e-sahar hai kaun kahe parvane se
dair-o-haram se uThne vaale aa.e hain maiḳhane men
is pe agar taqdir uTha de jaa.en kahan maiḳhane se
josh-e-junun sa rahbar ho to hosh ki manzil duur nahin
divane ne raah bana di basti tak virane se
saaqi ke andaz ko dekho be-ḳhud piine valon men
milti hai mai qismat se go baTti hai paimane se
zarf miri qismat ka bhara hai aap nigah-e-saqi ne
paimane ko ḳhum se mili aur ḳhum ko mili paimane se
umr-e-do-roza ‘kaifi’ ki yuun kaT hi ga.i yuun kaTni thi
kaam raha paimane se aur saaqi ke maiḳhane se
Leave a Reply