tariqat men agar zahid mujhe gumrah jaane hai
mire dil ki haqiqat ko mira allah jaane hai
vo be-parva mira kab imtiyaz-e-chah jaane hai
miri halat ko dil aur dil ki halat aah jaane hai
use jo dekhta hai din ko so ḳhurshid jaane hai
jo ghar se raat ko nikle to aalam maah jaane hai
hamari baat ko vo aqibat-na-fahm kya maane
jo bad-ḳhvahon ko apne apna daulat-ḳhvah jaane hai
mira dil bar-e-ishq aisa uThane men dilavar hai
jo us ke koh duun sar par to us ko kaah jaane hai
hamen dair o haram shaiḳh o barhaman se nahin matlab
hamara dil to apne dil ko baitullah jaane hai
vo vahshi is qadar bhaḌka hai surat se mire yaaro
ki apne dekh saa.e ko mujhe hamrah jaane hai
kahen ham bahr-e-be-payan-e-gham ki mahiyat kis se
na lahron se koi vaqif na koi thaah jaane hai
ḳhuda ke vaste insaf kiijo kya tamasha hai
main us ka ḳhair-ḳhvah aur vo mujhe bad-ḳhvah jaane hai
agar vo fitna jo tujh se mile ‘hatim’ to kah diijo
ki mansube tire sab banda-e-dargah jaane hai
Leave a Reply