Shaista Mufti
khali kamre men mira rakht-e-safar rakkha hai
chand arman hain poshida nihan-khane men
kirchiyan khvab ki rakkhi hain hifazat se kahin
aur kuchh phuul chhupa rakkhe hain anjane men
dhundhti phirti rahi ruuh kisi sathi ko
dar-ba-dar thokaren khata raha pindar mira
apni mitti se bhi utthi nahin sondhi khushbu
ghair ke des men lutta raha sansar mira
ajnabi ankhon men manus vafaon ka charagh
ek ummid pe jalta raha ghup raton men
jism mitti ki tarah ghulta raha paani men
rang be-rang hue jaate the barsaton men
teri ummid pe khola hua dar rakkha hai
khali kamre men mira rakht-e-safar rakkha hai
Leave a Reply