Saghar Mehdi
ik ajnabi ḳhayal men ḳhud se juda raha
niind aa ga.i thi raat magar jagta raha
sangin hadson men bhi hansti rahi hayat
patthar pe ik gulab hamesha khila raha
duniya ko us nigah ne divana kar diya
main vo sitam-zarif ki bas dekhta raha
ik ajnabi mahak si lahu men rachi rahi
naghma sa jan-o-tan men koi gunjta raha
ab ja ke ye khula ki har ik shaḳhs dosto
har shaḳhs ko libas se pahchanta raha
fikr-e-suḳhan men raat jo aaya ḳhayal-e-‘mir’
ta-der Diary pe qalam kanpta raha
‘saghar’ tamam umr ki gardish ke bavajud
main us nigah-e-naz se na-ashna raha
Leave a Reply