main ab-e-ishq men hal ho gai huun
adhuri thi mukammal ho gai huun
palat kar phir nahin aata kabhi jo
main vo guzra hua kal ho gai huun
bahut takhir se paaya hai khud ko
main apne sabr ka phal ho gai huun
mili hai ishq ki saughat jab se
udasi tera anchal ho gai huun
sulajhne se ulajhti ja rahi huun
main apni zulf ka bal ho gai huun
barasti hai jo be-mausam hi aksar
usi barish men jal thal ho gai huun
miri khvahish hai suraj chhu ke dekhun
mujhe lagta hai pagal ho gai huun