aa gaya vaqt ki ho davat-e-am ai saaqi
bhej de charon taraf apna payam ai saaqi
khinch la.ega hazaron ko tire paas yahan
ye tira husn-e-nazar husn-e-kalam ai saaqi
ghar luTane ki nahin ghar ko bachane ki hai fikr
kis qadar ishq hai mera abhi ḳhaam ai saaqi
kasa-e-dil hai tire samne us ko bhar de
mai-e-angur to hai mujh pe haram ai saaqi
un se bachna hai tire lutf-o-karam par mauquf
hain rah-e-ishq men phaile hue daam ai saaqi
kab na.e nazm se duniya ko milegi rahat
kitna mohlik hai ye farsuda nizam ai saaqi
duur goshe men hai uftada-o-dil-gir ‘uruj’
aa kabhi us ki taraf bada-ba-jam ai saaqi
Leave a Reply