Kanval Malik
teri rahon men Daal kar Dere
tire raste men baiThna hai mujhe
teri rahon ki ḳhaak chhanni hai
ḳhud ko miTTi men rau.dna hai mujhe
vasl ki ab nahin koi surat
duur se roz dekhna hai mujhe
tujh ko chhune ki bhi nahin ḳhvahish
tujh ko ankhon se chumna hai mujhe
tujh ko sehn-e-haram men manga tha
tujh ko rekha men DhunDhna hai mujhe
yaad aati nahin tumhen meri
tujh se ik baar puchhna hai mujhe
tujh ko fursat nahin hai sunne ki
apni ghazlon men bolna hai mujhe
tere ḳhvabon men mast rahti hain
apni ankhon ko nochna hai mujhe
tere baare men soch haari huun
apne baare bhi sochna hai mujhe
ye safar kis qadar kaThin hai naan
da.eron men hi ghumna hai mujhe
Leave a Reply