raste ham se raaz kahne lage
phir to ham raston men rahne lage
mere lafzon ko mil ga.i ankhen
saare aansu labon se bahne lage
shahr ke lafz kar diye vapas
apni zaat apni baat kahne lage
ham abhi Thiik se bane bhi na the
ḳhud se Takra.e aur Dhahne lage
us ne talqin-e-sabr ki thi so ham
jo na sahna tha vo bhi sahne lage
ham ne miTTi ki beḌiyan kaTin
toḌa zindan-e-ab bahne lage
muzhda ai sakinan-e-shahr-e-suḳhan
‘farhat-ehsas’ sher kahne lage
Leave a Reply