kiya taajjub ki miri ruh-e-ravan tak pahunche
pahle koi mire naghmon ki zaban tak pahunche
jab har ik shorish-e-gham zabt-e-fughan tak pahunche
phir khuda jaane ye hangama kahan tak pahunche
aankh tak dil se na aae na zaban tak pahunche
baat jis ki hai usi afat-e-jan tak pahunche
tu jahan par tha bahut pahle vahin aaj bhi hai
dekh rindan-e-khush-anfas kahan tak pahunche
jo zamane ko bura kahte hain khud hain vo bure
kaash ye baat tire gosh-e-giran tak pahunche
badh ke rindon ne qadam hazrat-e-vaiz ke liye
girte padte jo dar-e-pir-e-mughan tak pahunche
tu mire hal-e-pareshan pe bahut tanz na kar
apne gesu bhi zara dekh kahan tak pahunche
un ka jo farz hai vo ahl-e-siyasat janen
mera paigham mohabbat hai jahan tak pahunche
ishq ki chot dikhane men kahin aati hai
kuchh ishare the ki jo lafz-o-bayan tak pahunche
jalve betab the jo parda-e-fitrat men ‘jigar’
khud tadap kar miri chashm-e-nigaran tak pahunche
Leave a Reply