Farhan Salim
ye kya hua ki sabhi ab to daagh jalne lage
hava chali to lahu men charagh jalne lage
miTa gaya tha lahu ke sabhi nishan qatil
magar jo shaam Dhali sab charagh jalne lage
ik aisi fasl utarne ko hai gulistan men
zamana dekhe ki phulon se baagh jalne lage
nigah-e-ta.ir-e-zindan uThi thi ghar ki taraf
ki soz-e-atash-e-giryan se daagh jalne lage
ab us maqam pe hai mausamon ka sard mizaj
ki dil sulagne lage aur dimagh jalne lage
ab aa bhi ja ki yuun hi duur duur rahne se
ye mere honT vo tere ayagh jalne lage
naha ke nahr se ‘salim’ pari vo kya nikli
ki tab-e-husn se ḳhud astabagh jalne lage
Leave a Reply