khizan ka khauf bhi hai mausam-e-bahar bhi hai
kabhi tumhara kabhi apna intizar bhi hai
simatti jaati huun badhti hain duriyan jab bhi
ajiib shakhs hai nafrat bhi us se pyaar bhi hai
hua hai zakhmi mira e’timad jis din se
udaas hi nahin dil mera be-qarar bhi hai
alag hai sab se tabiat hi us ki aisi hai
vo be-vafa hai magar us pe e’tibar bhi hai
baharen jaati hain jaane do tum to ruk jaao
bahut dinon se tabiat men intishar bhi hai
khadi huun aaj bhi main sang-e-mil ki surat
‘kiran’ kisi ka zamane se intizar bhi hai